Die Färv op mingem Stempelkesse es drösch,
en handjeschrevvne Posskaat litt he om Desch.
Die schick ich dir, su wie immer wenn,
dat Leed em Radio läuf un ich ahn dich denk.

Die letzte Klapp kohm vill ze fröh,
dat Driehbooch hat noch ärsch vill vür.
Doch am Eng führt mer janz allein Regie,
söök se sich selvs us, die nächste Düür.

Ich drink op ding Dräum un op et Levve,
Op uns ahle, joode Zick,
op all die Schöss,
op dich un mich
un die verlorene Stunde,
op all die letzte Runde –
un op di Meisterstöck.

Kuns jitt Kraff, doch koss se Moot,
ne Minsch, dä nie verstande wood,
wie ärsch mer manchmol Fründe bruch,
wie Leeder helfe en der Nuut.

Ich drink op ming Dräum un op et Levve,
Op uns ahle, joode Zick,
op all die Schöss,
op dich un mich
un die verlorene Stunde,
op all die letzte Runde –
un op mi Meisterstöck.
Op all die Schöss,
die ich hück vermiss,
un die verlorene Stunde,
op all die letzte Runde –
un op mi Meisterstöck.