Fooßball jespillt, bes et düster wood,
der janzen Daach en der Körnerstross,
am eetzte Ovend wor die neue Botz
ald kapott - jar nit joot.

Em Jebüsch wild eröm jeknutsch,
opjepass, dat jo keiner luurt,
schnell jemerk, dat do noch jet wor,
vill ze koot - ävver joot...

Jo dat wore - de jeilste Johre,
jo ich denk su jään zoröck,
ahn die joode ahle Zick!
Denn dat wore - de jeilste Johre,
un es dat längs ald nit mieh wor,
die Erinnerung dodran bliet immer do.

Papp un Mamm, han schnell jecheck,
dat der Klein wohl anders tick,
se han mich laufe losse -
minge Wääsch, dat wor nit schlääch.

Koot studiert, nur nit wat ich sullt,
dann kohm zom Jlöck der Rock‘n Roll,
ne joode Fründ, dä hück noch
zo mir steiht, sujet jeiht!

Bridge
Un weede Hoore langsam jrau,
sitze doheim och Kind un Frau,
han ich doch manchmol dat Jeföhl,
wie domols, als de Welt noch jold,
völlig frei un ohne Schuld,
e Levve zwesche alle Stöhl...

Ich ben jeboore - för de jeilste Johre ...